همس المشاعر

” الضمير الدراسى “

جريدة فكرة

بما اننا ف منصف الترم و داخلين على فترة إمتحانات قريب و بما إن الكل بيبقى متلغبط و حالته مش متظبطه و ضميره الدراسى بيأنبه و مش عارف يعمل إيه ؟ و زى ما إحنا عارفين أن الطالب المصرى بيقضى اغلب الترم يعد فى الكتب و يحفظ اسماء المواد و يصور محاضرات و مذكرات و كل يوم يقول أنا هذاكر و مش بيذاكر ، و يجى قبل الأمتحانات و يقول أعمل إيه ؟
حبيت اقول لكل طالب ملهوش نفس يذاكر و حاسس انه مش هيقدر يعمل حاجة …..
بلاش تخلى الافكار السلبية تسيطر عليك ، بلاش السرسره الكتيره على الفيس بوك اللى بتتكلم عن معاناة الطالب من المذاكره و قد ايه هى شبح بيهدد الطالب ، بلاش تخلى دماغك يعمل من الافكار السلبية دى ملف و قضيه تقلقك و تأثر عليك و تزود مشكلتك … متفكرش اكتير ابدأ من دلوقتى و قول أنا هقدر ، أنا هذاكر ، أنا هنجح … الكلمات دى هتبعت اشارات لدماغك و هيبدأ يتبرمج عليها و تزود تحفيزك..
خليك إيجابى ضع دائما هدف نصب عينيك ، و خليك فاكر دايما ان نجاحك ده مش نجاح ليك لوحدك و مش هيأثر عليك انت بس .. لا ده نجاح ليك و لاسرتك اللى دايما عايزين يشوفوك ناجح و مبسوط و بيتعبوا علشان انت تنجح و تكون سعيد فى حياتك …
فكر فيهم و ازاى نجاحك هيسعدهم و يفرحهم .
فكر تتعب شويه و تذاكر علشان تكون فخر ليهم زى ما بيتعبوا علشان يسعدوك و يشوفوك فى أحسن صوره .
نجاحك ده مش ليك لوحده لا ده نجاح ليك و لاسرتك و مجتمعك ، لما تكون انسان ناجح هتفيد اهلك و مجتمعك و كل اللى حواليك هتبقى قدوه لكل الشباب و تحفذهم انهم يكونوا زيك ….
و ساعتها هتبقى سعيد انك بتعمل حاجة عظيمه .
ممممم ايه رايك ؟ نذاكر ؟ قول اه و بلاش اسمع كلمة مفيش وقت و مليش نفس و اكتر كلمة بتضايقنى ” انا هبدأ اذاكر من بكره ” ابدأ من النهارده
و حب الماده الماده تحبك
وبالنجاح و التوفيق ان شاء الله .

مقالات ذات صلة

اترك تعليقاً

لن يتم نشر عنوان بريدك الإلكتروني.

شاهد أيضاً

إغلاق