تحقيقات وتقارير

خاص بفكرة / حديث مع المهندس مصطفى عبد العزيز رئيس حى باب الشعرية

حوار / اسلام  عبد العزيز محمد 


فى ظل الظروف الحالية وتشديد السيد الرئيس / عبد الفتاح السيسى على مواصلة تحسين الخدمات واستكمال مشروعات البنية التحتية وتذليل العقبات والعمل المستمر توجهنا الى رئيس حى باب الشعرية المهندس / مصطفى عبد العزيز بكثير من الاسئلة ..

*** ما هى المنظومة التى يعمل بها حى باب الشعرية لتقديم أفضل خدمة للمواطنين ؟

بالنسبة لمنظومة العمل داخل حى باب الشعرية , توجد مجموعة أقسام عديدة مثل النظافة / الآنارة / الرصف / التشجير / الآشغالات / الطرق , ولكل قسم طريقة عمل ومنظومة وهذا عمل يومى يتم من خلال مجموعات العمل اللى بتعمل تحت مساعد رئيس الحى وكل مساعد رئيس حى معاه مجموعته ومعاه بعض الشياخات بالحى بتتم خدماتها بمعرفته هو شخصيا , واى مشاكل بتظهر على الساحة سواء الطرق او النظافة او الانارة بيتم التعامل معها من خلال مساعد رئيس الحى وتحت اشراف رئيس الحى شخصيا علاوة على مرورى انا شخصيا من الساعة الثامنة صباحا حتى الساعة الواحدة ظهرا ثم يتم مقابلة المواطنين وبعدها بيتم نزولى للشارع مرة آخرى اكمل باقى العمل والمتابعة فى الشارع .

*** هل توجد اى عوائق تواجة المواطن فى استخراج أى ترخيص من داخل الحى ؟

أستخراج التراخيص من الحى بتأخذ الاجراءات العادية جدا بيتم التعامل معها من خلال المركز التكنولوجى لخدمة المواطنين بالحى بيتقدم المواطن بالطلب سواء ترخيص مبانى او محل او أعلان او اشغالات او أسواق , بيقدم الطلب الخاص به وبيتم فحص المستندات المطلوبة للترخيص اذا كانت المستندات كاملة بيتم استخراج الترخيص واذا كانت ينقصها اى شئ بيتم اخطار صاحب الطلب او من يهمه الامر وبنقوم بمعرفته بالاوراق التى تنقصه عشان يجيبها وتستكمل اوراقه عشان نديلة الترخيص بلا اى مشاكل .

*** هل يوجد تعاون مثمر بين رئاسة حى باب الشعرية وبين عضو مجلس النواب المسئول عن الدائرة ؟

بالتأكيد طبعا / لآن عضو مجلس النواب الاستاذ المحترم / نبيل بولس , رجل شعبى من الدرجة الاولى ومتواجد بصفة دائمة معنا ومع المواطنين فى الشارع وبيقوم بالاطلاع بنفسه على كافة الاعمال بالحى وبيكون بينا اجتماعات وتنسيق بينى وبينه بصفه يومية وبتتم اتصالات بينى وبينه بصفه يومية وده شئ مش جديد من قبل ان يكون نائب فى البرلمان , لانه طول عمره فى العمل الشعبى وبيسعى لخدمة المواطن , ومن كرم ربنا علينا ان ربنا كرمنا بسيادته لانه فعلا محترم وعملى جدا .

*** ما هى المشروعات والانشطة التى يقوم بها الحى فى الوقت الحالى لآظهار الحى بالشكل اللائق به ومدى تأثير هذه المشروعات ؟

هو حاليا يوجد بعض أعمال التطوير بشارع بورسعيد والميدان , وشارع بورسعيد من اهم الشوارع عندنا بالحى وتم رصفة منذ سنوات طويلة وكانت تأتى شكاوى عديدة من المواطنين بأن الرصيف الاوسط بالشارع , المواطنين بتقع من فوقه ( كبار السن / ذوى الاحتياجات الخاصة ) لم يستطيعوا الطلوع فوق الرصيف , علاوة على المرافق الموجودة الخاصة بالانارة والمياة اللى موجودة بالفعل تحت الرصيف كانت عاملة بعض التنفخات والتضخمات عليه , وبعض البلاط مكسور فيه , فا تم أخذ هذا البلاط المكسور القديم ولعدم اهدار المال العام اخذناه نرصف به الاماكن الداخلية بالحى اللى محتاجة بعض صيانة للبلاط وبنقوم بتركيب البلاط الجديد بعد ما نركب مواسير للمرافق لكابلات الكهرباء او المياة او التليفونات وبيتم اصلاح البنية التحتية اولا للمرافق وبعدها بنقوم بعمل بلورات جديدة وهيتم تبليط الارصفة بشكل محترم ولآئق وهنطور بعض المزلاقانات عشان يكون فيه سهولة لحركة المواطنين وبالأخص ( ذوى الاحتياجات الخاصة وكبار السن والمرضى ) وخاصة المواطنين المترددين على مستشفى السيد جلال أو على المدرسة او على الاسواق او مرور طريق الى طريق آخر , كل هؤلاء كانوا بيمروا بشئ من الاعاقة بسبب الرصيف العالى اللى موجود بقاله أكثر من 10 سنوات او 8 سنوات , ونحن لم نساعد على اهدار المال العام بالعكس أحنا بنستخدم البلاط القديم وبنشتغل بيه داخل الحوارى والشوارع الترابية الموجودة داخل حى باب الشعرية وهذه ليست أول مرة نفعل ذلك وهذا الشئ منذ ان توليت منصبى كا رئيس لحى باب الشعرية منذ ان اصبحت مسئول عن هذا الحى , وانا بنفذ ذلك الشئ لعدم اهدار المال العام لاننا قبل كاطنين مصريين ودى بلدنا ولازم نخاف عليها وعلى كل جنيه فيها , ولكن هناك ملحوظة أرجوا عدم الاستماع لبعض المواطنين الذين لا يفقهون شئ والذين يتجاوزوا ويسبوا دون بينه , المفروض قبل ما يسب ان يأتى يسأل ويستعلم من اى مسئول ويفهم أحنا بنعمل ايه وهنفهمه ونرد عليه بصراحة جدا بدل ما يقول كلام واتهامات لا يفقه عنها شئ ويتظاهر بأنه وطنى وثورجى وده كلام ملهوش أى قيمة انه يقال لانه بيتكلم دون فهم او توعية .

*** هل توجد اى عوائق او مشكلات تواجة الحى الآن بالنسبة لشكاوى المواطنين او الاستغاثات ؟

بالنسبة لشكاوى المواطنين او الاستغاثات او مخالفات المبانى او اى مشكلة أحنا كما ذكرت مسبقا بنقوم بمرور يومى من الساعة الثامنة صباحا وبتواجد فى الشارع وجميع المساعدين متواجدين طوال الـ 24 ساعة , كلا منهم داخل شياخته , ولو تقدم اى مواطن بشكوى او مشكلة انا بقوم بتعامل معها فى نفس اللحظة واى شكوى للمواطنين بتعامل معاها بصفه يومية وبيتم حل المشكلة لانى مش بقوم بتأجيل اى شئ .

*** ما هى رؤية سيادتكم بالنسبة للشباب داخل حى باب الشعرية ؟

الشباب فى المرحلة الحالية شئ أساسى ومهم جدا لانه هو مستقبل مصر القادم , اما بالنسبة للشباب بحى باب الشعرية انا بعتمد عليهم اعتماد كلى وانا معايا مجموعة من الشباب مجموعة محترمة جدا , شباب بيحب بلده وبيحب الحى وعاوز يطور بجد , شباب بستفيد منه كتير جدا لانه بينقل لى بعض أراء المواطنين داخل الحى ونقل مشاكل المواطنين والسلبيات الموجودة فى الشارع , سلبيات ممكن مكونش رأيتها أثناء مرورى بالحى او مش بشوفها فى أوقات معينة , وهم متطوعين بيقوموا بنقل الوضع كامل ومتواجدين معايا يوميا , علاوة على الحملات اللى بنقوم بها مثل حملات النظافة والتطوير بيكونوا متواجدين معانا وبيساعدونا , وبيقوموا بتوعية المواطنين بالحى ودى من الامور المهمة جدا , دول شباب واعى ومثقف وفاهم وعاوز يشوف بلدة ومكانه أفضل مكان وعاوز يطور بجد , وانا فخور بهم جدا وده من أسباب نجاحى فى عملى فى حى باب الشعرية والحمد لله .

*** ما هى رؤية سيادتكم بالنسبة لمشاركة الشباب فى انتخابات المجالس المحلية القادمة ؟

أتمنى ان آرى نسبة الشباب داخل المحليات أكثر من 80 % , الشباب الواعى والمثقف والفاهم والقادر على القيادة والعمل والتطور وليس الشباب الذين يسعون للمصالح الشخصية والشكليات , لاء , انا هنا داخل الحى آرى الشباب يتعاون على العمل الجاد والعمل الجماعى وبيشتغلوا أبتغاء لمرضات الله وأبتغاء لمكانهم وعاوزين يشوفوا مكانهم أفضل مكان بشكل لائق لراحة المواطنين بالحى , ده الشباب المحترم اللى يعتمد عليه وأتمنى أنى آرى شباب مصر كله كده , أتمنى ان آرى شباب بالمجلس المحلى ذو خبرة ووعى وعارفين يعنى أيه أدارة محلية وأيه واجباته تجاه مكانه ووجباته تجاه وطنه والمواطنين .

*** اذا توجهت برسالة للمواطنين بحى باب الشعرية , ماذا تقول لهم ؟

احب أن أقول لمواطنين حى باب الشعرية انى طول ما انا موجود بالحى ومعاكم , لا داعى للقلق ابدا , ايدى فى ايديكم ان شاء الله هنخلى حى باب الشعرية أفضل حى وهيتم تطويرة بصفة مستمرة وطول ما حضرتكم واقفين جانبى وساندنى وشغالين معايا بما يرضى الله ان شاء الله هيكون حى باب الشعرية افضل الاحياء بالعمل والمشاركة الجماعية .

الوسوم

تيسير علي

Graphic Designer Alexandria, Egypt t.aly@fekra.media

مقالات ذات صلة

اترك تعليقاً

لن يتم نشر عنوان بريدك الإلكتروني.

أنت تستخدم إضافة Adblock

برجاء دعمنا عن طريق تعطيل إضافة Adblock